**في الطريق من الشرقية للقاهرة**
ظابط الحراسة _ زين باشا، هنطلع على فين؟
زين بتعب وحزن _ اطلع على البيت.
ظابط الحراسة _ ماشي يا أفندم.
زين بص من الشباك وأخذ نفسًا طويلًا، وافتكر خبر وفاة عم حسن.
زين غير هدومه بسرعة، وعقله مش قادر يستوعب الخبر، وكان بيتمنى يكون في خطأ.
نزل وسافر الشرقية، وطلب من الحراسة تفضل بعيدة عن بيت عم حسن.
وصل المستشفى.
زين _ عم حسن فين؟
توحيدة ببكاء _ زين يا ابني، عمك حسن توفى خلاص.
زين حاول يمسك نفسه قدامها، وفضل يهديها.
وخلص إجراءات المستشفى والدفن والعزاء.
بعدها لقى شاب صغير في بداية العشرينات قرب منه.
الشاب _ زين باشا؟
زين _ نعم، أنت تعرفني؟
الشاب _ آه، أنا أحمد اللي مستأجر دكان عم حسن في السوق.
زين _ أهلًا يا أحمد.
أحمد _ حضرتك متعرفنيش أكيد، بس أنا عارفك من كلام حسن عنك. هو كان بيحبك جدًا.
زين _ أنت باين عليك إن عم حسن كان بيعزك أوي.
أحمد بحزن _ أيوه، عشان هو اللي ساعدني لما كنت محتاج حد يقف جنبي، وساعدني في شغلي. أنا مهما عملت مش هقدر أوفي فضله.
زين في نفسه _ يااااه يا عم حسن، أفضالك على الكل. غيابك وجعني أوي.
زين فاق لنفسه.
زين _ أنا سعيد إني اتعرفت عليك يا أحمد. وأنا مكان عم حسن موجود في أي وقت. دي أرقامي، اتصل عليا في أي وقت، واعتبرني أخوك الكبير.
أحمد _ ربنا يعزك يا باشا.
زين سابه وطلع لتوحيدة.
خبط عليها.
توحيدة فتحت.
توحيدة _ أهلًا يا زين.
زين _ أنا عاوز أقولك حاجة يا حجة توحيدة. جهزي أنتِ وبنتك عشان تيجوا معايا.
توحيدة _ نمشي فين؟ ده هنا بيتي وأهلي وناسي.
زين _ معلش ريحيني يا حجة. أنا هكون مطمن عليكم وأنتم جنبي.
توحيدة _ أنا مقدرة خوفك علينا، وصدقني لو في أي حاجة هاجيلك بسرعة.
زين _ أنا موجود في أي وقت. ولو احتجتيني اتصلي بيا.
توحيدة _ ربنا يخليك يا ابني.
زين _ حضرتك عارفة إن عم حسن كان غالي عندي.
توحيدة بحزن _ عارفة يا ابني. نفذ وصيته يا زين، أوعى تزعلها أو تكسرها عشان قلبه يرتاح.
زين _ في عنيا، متخافيش.
زين _ أنا مضطر أسافر. أشوفك على خير.
—
**في القاهرة، وتحديدًا في كلية الهندسة**
سارة _ يااااه يا حبيبتي، أنتِ عيشتي كتير أوي في حياتك. بس احمدي ربنا إنك وقعتِ في حد زي زين الجارحي.
ليليان بتهكم _ ليه يعني يا سارة؟ ما يمكن زي أعمامي.
وبخفوت _ أنا أصلًا مش مطمنة له بعد بعض المواقف اللي حصلت.
سارة _ لا يا ليليان، زين الجارحي رجل أعمال معروف، ومستثمر كبير، وسمعته كويسة. أنا عمرى ما سمعت عنه مشاكل.
ليليان _ اللي شوفته خلاني أشك في ناس كتير. ربنا يسامحهم.
سارة _ طيبة أنتِ.
إيه ده؟ مش ده السواق بتاعك جاي علينا؟
ليليان _ خير يا كريم؟
كريم بصوت واطي _ زين باشا على التليفون، عاوزك.
ليليان أخدت منه التليفون.
ليليان _ ألو.
زين _ ليليان، كريم هيوصلك على البيت. أنا في البيت، مرحتش الشركة.
ليليان _ احم، هو حضرتك كويس؟
زين _ أيوه، ويلا تعالي.
ليليان _ تمام.
ليليان ادت التليفون لكريم.
كريم مشي.
ليليان _ سارة، هقوم أمشي. زين موجود في البيت وعاوزني أرجع.
سارة _ تمام يا قلبي، أشوفك بكرة.
—
**في الشرقية**
عاصم بضيق _ حسن مات، وأنا معرفتش البنت فين. هنوصل لها إزاي؟
يوسف _ بابا، تفكيرك غلط. حسن ولا حد من عيلته يعرف مكانها، وأنا اتأكدت بنفسي.
عاصم _ وممكن متظهرش.
يوسف _ اسمح لي أدور عليها بطريقتي، وأوعدك هعرف مكانها.
عاصم _ متعرفش مين الشخص اللي كان بيساعدها؟
يوسف _ لا، بس شوفته بيتكلم مع أحمد اللي مستأجر دكان حسن. لو عاوز تعرف، اديني وقت وهجيب لك معلومات عنه.
—
**في القاهرة**
ليليان وصلت البيت ولقت دادة سميحة في استقبالها.
دادة سميحة _ يلا روحي غيري هدومك، زين قاعد على السفرة مستنيكي.
ليليان راحت غيرت هدومها بسرعة، وكانت نفسها تطمن عليه. مش عارفة ليه قلبها وجعها عليه، وعلى شكله من اليوم اللي سمع فيه خبر عم حسن.
نزلت على السفرة.
زين قاعد مهموم وحزين.
ليليان _ احم.
زين بانتباه _ ليليان، يلا اتغدي.
ليليان _ هو حضرتك كويس؟
زين _ أيوه.
زين كان طول الوقت بيفكر هيقول لها إزاي.
—
**في الشرقية**
سهى _ البقاء لله يا إيمان. معلش تماسكي عشان مامتك.
إيمان _ قلبي واجعني أوي يا سهى. بابا راح خلاص.
سهى _ معلش يا حبيبتي.
إيه رأيك تقولي لي مين الشخص اللي كان موجود في العزاء؟
إيمان بضيق _ أنتِ في إيه ولا إيه؟ بقولك أبويا مات، بتسأليني عن شخص؟
سهى _ معلش يا حبيبتي، مكنتش أقصد.
وطلعت تليفونها وبعتت رسالة.
—
**بليل في بيت الجارحي**
زين قاعد على السرير وحاطط راسه بين إيديه ومغمض عيونه.
ليليان ببراءتها جت جنبه.
ليليان _ هو أنت كويس؟
زين رفع وشه وبصلها كتير.
زين _ ليليان، أنا كنت عاوز أقولك خبر.
ليليان _ خبر إيه؟ خير؟
زين _ عم حسن…
ليليان بخضة _ ماله؟ جراله إيه؟ أكيد زعلان مني عشان مكلمتوش.
زين قاطعها _ عم حسن توفى… البقاء لله.
ليليان بهدوء _ قول إنك بتهزر… إزاي؟ هو وعدني يفضل جنبي.
زين سكت، وحط وشه في الأرض ومش عارف يقول إيه.
دموع ليليان نزلت.
ليليان _ مش كل مرة حد أحبه يبعد عني كده. ومين يقدر ياخد الناس اللي بنحبها؟
زين _ اهدى، الموت علينا حق، وده أجله.
ليليان بدأت تبكي بشدة _ محدش حاسس بيا… أنا تعبت.
زين تأثر من منظرها، وحاول يهديها.
زين _ أنتِ مش لوحدك، وأنا موجود. أوعى تقولي إنك لوحدك.
ليليان _ أنت مين؟ أنت مش تعرفني عشان تخليني في بيتك. أنت مجرد شخص وعد عم حسن إنه يساعدني.
زين _ لا، اللي رابطنا أكبر من وعدي لعم حسن. صدقيني، أكبر بكتير.
زين فضل يهديها لحد ما نامت.
زين في نفسه _ هو أنا من إمتى بقيت كده؟ من إمتى حد بقى يهمني؟ ليه حزنها وجعني بالشكل ده؟ هي لسه في حياتي من أيام قليلة، لكن مش قادر أشوفها متألمة.
اتنهد، واستسلم للنوم، وعقله مشغول بيها وبكل اللي حصل.
—
**في الشرقية**
أحمد نازل من عند توحيدة بعد ما سألها لو محتاجة حاجة.
لقى في وشه يوسف.
يوسف _ أحمد، إزيك؟
**يتبع…**
