تنزل أم فاطمة تجيب العلاج من الشارع، وشهاب والبنات يروحوا. يحط شهاب فاطمة على التخت ويقعد جنبها.
شهاب: مش حاسة بتحسن؟
فاطمة: جسمي فك شوية.
شهاب: المرض ده كان عند جدتي الله يرحمها.
شهاب: ههههه لا، مش للدرجة دي طبعًا. هي كانت عندها السكر.
فاطمة: آه.. الله يرحمها.
شهاب: فمتخافيش، هو كده كان الدكتور بيقولها إن ليها هجمات على الجسم بسبب المناعة، يعني تخفي فجأة ويجيلك أعراضه كلها فجأة، وبتروح لوحدها بردوا.
فاطمة بحزن: كنت ناقصة أنا أمراض بس.
تدخل هند وتقف عند الباب.
شهاب: قولي الحمدلله، هتعدي إن شاء الله.
فاطمة: الحمدلله.. شكرًا يا شهاب ع اللي عملته معايا، جميلك ده إحنا عمرنا ما هننساه أبدًا.
شهاب: على إيه بس؟ مفيش جمايل ولا حاجة.. إنتي آه هديتي حيلي بس ماشي.
فاطمة بانفعال: إيه هديتي حيلي دي؟ تقصد إني طخينة؟
شهاب: يا عم أقصد إنك زي القمر وتستاهلي هدة الحيل لو هشيلك كل يوم.
تتحرج فاطمة.
هند بتريقة: وإيه كمان يا عم النحنوح؟
شهاب باستفزاز وهو باصص لفاطمة: وشكلك كان حلو وإنتي عيانة، مش عارف ليه، يمكن عشان كنتي دايمًا مصدرة الوش الخشب، وأول مرة أشوفك حنينة. آه وحاجة كمان، عيب أوي لما تقفي ع الباب تتصنتي ع كلام الناس.
فاطمة: ههههه.
هند: لا والله!!!
شهاب: آه والله عيب.
يبص لهند.
شهاب: إيه ده هند، طب كباية شاي من إديكي الحلوين بقى.
هند: كمان هتضايف؟
شهاب: والله ده المفروض زوقيًا منك لأني في بيتكم، بس واضح إن مفيش أي زوق، فمضطر أطلب بنفسي.
تبصله بغيظ وتمشي.
شهاب بصوت عالي: عقبال ما نشيلك يا جمييييل!
تبتسم هند.
فاطمة: بتحب تستفزها إنت.
شهاب: أنا بحب أستفز أي حد.
فاطمة: هههههه.
يقوم شهاب.
فاطمة: رايح فين؟
شهاب وهو بيعدل قميصه: همشي بقى.
فاطمة: يا بني اصبر، بتعملك الشاي.
شهاب: بتهزري ولا إيه؟ أنا أشرب شاي من إيد هند دي؟ مش بعيد تحطلي فيه سم.
فاطمة: يلهوي لا طبعًا.
شهاب: أقلها هتفلي فيه.
فاطمة: هههههههههه.
شهاب: وربنا ما بهزر.
فاطمة: لا امشي أحسن.
شهاب وهو بيمدلها إيده: سلام.
فاطمة تمدله إيدها: سلام.
يبوس إيدها.
شهاب: ألف سلامة عليكي.
تتحرج فاطمة.
فاطمة: الله يسلمك.
شهاب: ممكن تديني رقمك عشان أبقى أطمن عليكي؟
فاطمة بارتباك: آه أوك.
يديها الفون بتاعه تكتب رقمها.
شهاب: هبقى أجي أشوفك بردوا.
فاطمة: تسلم.
يمشي شهاب يقابل هند.
هند وهي ماسكة الشاي: رايح فين؟ عملت الشاي!!
شهاب: تسلم إيدك، بس انهاردة إجازة ولازم أرجع العربية لصاحبتها.
هند: صاحبة الشغل؟
شهاب: بنت خالتي.
هند: هي صاحبة الشغل تبقى بنت خالتك؟
شهاب: آه.
هند: ما أنا قلت بردوا، شهاب سرق مين عشان يبقى معاه العربية دي فجأة؟ اتاريها عربون محبة.
شهاب: لا، شهاب عمره ما بص لحاجة في إيد غيره، ولا مد إيده على حاجة متخصوش، أو من ورا صاحبها، أو مشي ورا الستات عشان فلوسهم. لا، ده هما وفلوسهم اللي بيجروا ورايا وبطنش. اللي متعرفيهوش عن شهاب إن عينه مليانة، سواء فلوس، فهي مع الكل بتروح وتيجي، ولا حتى الحريم. وشكرًا ع الشاي اللي مطفحتهوش.
يمشي شهاب.
هند: هو زعل ولا إيه.. يتفلق.
ينزل شهاب يقابل أم فاطمة.
الأم: رايح فين؟
شهاب: راجع الشغل، أودي العربية.
الأم: طب نتغدى سوا الأول؟ إنت من الصبح بتلف معانا.
شهاب: الله يخليكي يا أم هند، مرة تانية عشان اتأخرت.
الأم: ماشي يا بني، شكرًا ع وقفتك جنبنا، نردهالك في الأفراح بإذن الله.
شهاب: العفو ع إيه؟ ولو في أي حاجة قوليلي، حتى لو العربية مش معايا هتصرف، متقلقيش.
الأم: الله يخليك يا حبيبي، ربنا يباركلك يا رب.
شهاب: تسلمي.
يركب العربية ويمشي.
يعدي الوقت، يوصل شهاب ڤيلة كارمن عشان يرجع العربية، لأن الشركة إجازة. لسه هيرن الجرس، يلاقي باب الڤيلا مفتوح. لسه هيدخل…
أنچي: يخربيتك! مش هتبطلي الفيديوهات دي!!
كارمن: ولما أبطلها آخد حقي إزاي؟
أنچي: وإنتي إيه اللي مخوفك كده؟ إنهم ممكن يغدروا بيكي؟
كارمن: في مجالي ده مش مضمونين أبدًا. تهريب الهيروين مع بضاعتي، في الأول والآخر أنا اللي هلبسه لو اتبلغ عني، لأن كلهم مخفيين، دول مجرد ممولين بس.
يتخض شهاب.
كارمن: لكن مين اللي في وش المدفع؟ أنا.
أنچي: أممم.
كارمن: في الفيديوهات دي عشان لو بس حد فيهم فكر يغدر بيا أو يخلع لو أنا اتمسكت.
أنچي: يا ذكية، ما إنتي هتتفضحي بردوا من الفيديوهات، ليكي معاهم!!
كارمن: لا بسيطة. قبل ما أنشر أي فيديو، هحط غيامة ع وشي، وبعدين أنشر بقى ع النت، ولعيلته، وللعالم كله. أما مين المزة اللي في الفيديو محدش هيعرف.
أنچي: ده إنتي دماغك سم بجد.
كارمن: عيب عليكي.
أنچي: زوهير يعرف حاجة من دي؟
كارمن: لا طبعًا، إنتي اتهبلتي؟ يعرف إيه؟ إني بخونه عشان أمشي شغلي اللي هو ميعرفش عنه حاجة أصلًا؟ اسكتي يا هبلة، ده يطلقني فيها.
شهاب بصوت واطي: يا ولاد الكلب.
يرن الجرس، تفتح الشغالة، يدخل شهاب.
شهاب: سلاموا عليكم.
كارمن: تعالى يا شهاب.
يقرب عليهم.
شهاب: معلش جيت من غير ميعاد.
كارمن وهي بتحط رجل ع رجل وفي إيدها السيجارة: ميعاد إيه؟ ده بيتك يا شهاب، متقولش كده.
شهاب: كنت جاي بس أرجعلك العربية عشان انهاردة وبكرة إجازة، لتحتاجيها.
كارمن: يا بني أنا مش قلتلك كذا مرة إن أنا عندي غيرها؟ وخليها معاك، تاعب نفسك بيها ليه بس؟
شهاب: معلش، أنا مرتاح كده.
كارمن: طيب زي ما تحب.
شهاب: عن إذنكم.
كارمن: طب اقعد اشرب حاجة.
شهاب: معلش، مرة تانية.
يمشي شهاب.
أنچي بإعجاب: مين المز ده؟
كارمن: ده ابن خالتي.
أنچي باستغراب: والله!!!!
كارمن: والله بجد، في إيه؟
أنچي: لا مفيش، بس أول مرة أعرف إن ليكي قرايب أصلًا.
كارمن: لا، لما نزلت مصر زورت جدي وكده، فحبيت أزور خالتو وشفتوا هناك، وعشان حظي الحلو خالتو قالتلي أشغله معايا، بس أنا كده كده مكنتش هفلته من إيدي لو هي مكانتش طلبت.
أنچي: يعني إنتوا سوا؟
كارمن: للأسف لأ. حاولت كتير، بس هو تقيل أوي مع إنه بتاع بنات.
أنچي: طب ما تسيبهولي.
كارمن: بعينك. ده بتاعي وهييجي تحت رجلي، هييجي.
أنچي بيأس: أممم طيب.
يمشي شهاب ودماغه عمالة تودي وتجيب، يرن فونه.
شهاب: ألو.
سو: إيه يا شهاب؟ كده الغيبة دي!!!
شهاب: معلش والله مشغول.
سو: ومن إمتى بتنشغل عني؟
شهاب: هجيلك انهاردة.
سو بفرحة: بجد؟
شهاب: والله جاي بالليل.
سو: طيب هستناك.
يعدي الوقت، يرن جرس بيت فاطمة، تفتح هند.
هند: هيثم!!!!!!!
هيثم: سلامو عليكم.
هند: عليكم السلام.
هيثم: سمعت إن فاطمة تعبانة، فكنت جاي أشوفها بس.
الأم من المطبخ: مين يا هند؟
هند: ده هيثم.. جاي يشوف فاطمة.
الأم: دخليه بسرعة.
هند: نعم!!!!!
الأم: اسمعي الكلاااام.
هند: طيب.. اتفضل.
يدخل هيثم.
الحلقة الرابعة عشر ١٤
الأم وهي خارجة له: منور يا حبيبي.
هيثم: بنورك يما، أنا قلت أجي أشوف فاطمة، هي حصلها إيه؟
الأم: عين ولاد الحرام يا بني.
هيثم: لا إن شاء الله تكون بخير.
الأم: إن شاء الله.
هيثم: وكنت كمان عاوز أتصالحلها على حاجة كده، ينفع أدخلها؟
الأم: آه وماله، مهي تكية أبوك يا روح أمك.
تقلع الشبشب وتلقطه في إيدها.
هيثم بخضة: في إيه؟
الأم بانفعال: في إيييه بقى؟ أنا تتهجم ع بنتي يا ابن ستين جزمة؟ دي ستك يا ولا، وضوافرها برقبة المنطقة دي كلها، وكمان جاي لحد البيت يا ابن البجحة!
تضرب فيه بالشبشب ع وشه وع جسمه وهو مش لاحق حتى يتكلم أو يجري.
هند: أيوة كده، يستاهل يا ابن الجزمة.
هيثم: بااااس! الله يخربيتك.
يفلت هيثم من تحت إيدها.
هيثم بزعيق: وحياة أمي ما أنا سايبكم!
الأم وهي بتحدفه بالشبشب: غور، كاك داهية في شكلك، غوووور!
هيثم: مااااشي.
يمشي هيثم.
هند: أنا استغربتك أما دخلتيه!!!
الأم: كنت بصطاده يا بنت الهبلة.
