الأب: طيب يا خويا، وإنت بقى حمل خطوبة وجواز وشقة وعفش وشبكة؟
شهاب: هو حوار الشقة ده لسة شوية عليه، أنا داخل جمعية كبيرة، لكن حاليًا أقدر أجيب شبكة وأعمل خطوبة.
الأب: وأنا بردوا كنت شايلك مبلغ من مكافأة المعاش.
شهاب بفرحة وهو بيبوس إيد أبوه: حبيبي يا حج.
الأب: ع بركة الله.
يعدي الوقت، شهاب واقف مع صحابه في الشارع، يرن فونه، يلاقيه كارمن، يتنهد.
شهاب: ألو.
كارمن: إيه يا شهاب؟ من امبارح بتصل بيك، إنت كويس؟
شهاب: كنت تعبان بس مش عارف أتكلم.
كارمن: طب لتكون محتاج دكتور؟
شهاب: لا مش محتاج، أنا بقيت أحسن دلوقتي.
كارمن: طب الحمدلله، ريح إنت بس.
شهاب: معلش مجتش الشغل انهاردة.
كارمن: لا ولا يهمك، ما أنا عارفة إنك تعبان، عشان كده كنت بتصل بيك أطمن عليك، وخليك بكرة كمان ولو لقيت نفسك لسة تعبان خد باقي الأسبوع.
شهاب: شكرًا يا كارمن.
كارمن: العفو يا حبيبي ع إيه؟
يتضايق شهاب من كلمة حبيبي، مش حابب يكون بينهم الأسلوب ده.
كارمن: المهم إنك تبقى كويس، وأنا هبقى أتصل أطمن عليك، بس ياريت ترد عشان متقلقنيش، أوك؟
شهاب: أوك حاضر.. سلام.
يقفل شهاب ويبان ع وشه إنه متضايق.
عصام: إيه مالك؟
شهاب: ماليش.
في بيت فاطمة، قاعدة هي وأمها وأخواتها بيتغدوا. فاطمة عاوزة تفاتحهم في الموضوع، بس مش عارفة تدخل إزاي.
فاطمة: ماما.
الأم: نعم؟
فاطمة بتوتر: آآ.. شهاب كلمني إنه عاوز يتقدملي.
تتصدم هند وتبص لإسراء.
الأم باستغراب: شهاب ابن الجيران اللي في وشنا؟
فاطمة: آه.
الأم: والله كنت حاسة.
فاطمة: هو لسة مكلمني امبارح.
الأم: هتستهبلي يا بت؟ ما إنتي بتكلميه من فترة.
فاطمة: والله لسة مكلمني في موضوع الجواز ده امبارح.
هند بانفعال: جواز إيه وخرة إيه؟ الواد ده بيلعب بيكي.
فاطمة باستغراب: ويلعب بيا ليه يا هند؟
هند: يعني مش عارفة ليه؟ ده ياما مسكنا في خناقة أمه وأخواته، وكان يشوفنا في الشارع يبصلنا بغل ويقعد يلقح بالكلام زي الستات، إنه هيعمل ويسوي فينا، وتقوليلي عاوز يتقدملك؟
فاطمة: كان الكلام ده يا هند، وهو قالي اللي فات خلاص فات.
هند: لا مكانش يا روح هند. كل التغيير اللي اتغيره فجأة ده كنت حاسة إنه وراه غرض، وأهو الغرض بان أما قال عاوز يتجوزك.
فاطمة: مش فاهمة غرض إيه، وبعدين التغيير ده محصلش فجأة ولا حاجة.
تقوم هند تمشي وسايبة فاطمة دماغها عمالة تودي وتجيب ومش عارفة تعمل إيه. تقوم تدخل أوضتها وتنزل دموعها.
فاطمة في سرها: معقول يكون عاوز يرتبط بيا عشان ينتقم مننا؟ طب إحنا عملناله إيه لكل ده؟ لا لا، أكيد كلام هند غلط عشان هي مبتحبوش بس.. هو بيحبني زي ما قال ومكدبش.. مكانش باين في عينه إنه كداب.. هو بيحبني.
هند في المحل عمالة تنزل دموعها.
يعدي الوقت، يرن فون فاطمة.
فاطمة: ألو.
شهاب: إيه يا قلبي؟ كلمتيهم؟
فاطمة: آه.
شهاب: إيه مالك؟
فاطمة: ماليش.
شهاب: لا في حاجة، حصل إيه؟
فاطمة: هند عكت الدنيا.
شهاب: ليه كده!!!
تحكيله.
شهاب: هي عندك؟
فاطمة: لا، نزلت المحل.
الحلقة الثامنة عشر ١٨
شهاب: طب أنا هتصرف في الموضوع ده.
فاطمة: هتعمل إيه؟
شهاب: اقفلي وهكلمك كمان شوية طيب.
فاطمة: ماشي.
يقفل شهاب ويقرب ع المحل. هند قاعدة جوة تشوفه وهو داخل، يقرب يشد كرسي ويقعد عليه بالمشقلب قصادها.
شهاب: إيه يا عم؟ للدرجادي بتكرهيني؟
متردش.
شهاب: ليه عقدتهالي يا هند؟
هند وهي باصة في حتة تانية: عشان اللي قلته صح.
شهاب: عندك حق. أنا فعلًا بتاع بنات، بس عشان حر ومش مرتبط ولا عندي حبيبة أصونها، وفعلاً بتاع مشاكل، بس مش مع كل الناس، مع اللي يجر شكلي بس، وأي بني آدم كده، بس الفرق إني بعرف أجيب حقي كويس. لكن تخليني عاوز أنتقم منكوا بارتباطي بفاطمة، تبقي معلش عيلة هبلة.
تبصله.
شهاب: أنا لو عاوز أنتقم منكوا مش هحتاج أرتبط بحد فيكوا عشان أعمل كده. ده مفيش أسهل من أذية أي بنت أو تخريب سمعتها في أي مكان، فمش هتعب نفسي بخطوبة بقى والجو ده. فشيلي الفكرة دي من دماغك. أنا مش عاوز أنتقم من حد، ومحصلتش الكارثة يعني اللي تخليني أعمل كده. دي كانت خناقات ستات، وإنتوا لسانكوا طويل وكنتوا بتستفزوني عشان كده كنت بطر أرد.
هند: عاوز تفهمني إنك مش هتأذيها؟
شهاب: لا مش هأذيها عشان أنا بحبها.
هند بابتسامة وجع: بتحبها؟
شهاب: آه بحبها. وأنا لما بحب ع فكرة مبعرفش أأذي.
هند: محدش بيأذي غير اللي بيحبوا، ومحدش اتوجع قد اللي حب.
شهاب: مش أنا يا هند، والأيام هتثبتلك.
هند: أنا مش عاوزاك تثبتلي حاجة. فاطمة آخر مرة رحنا بيها للدكتورة في الاستشارة، إنت مكنتش معانا. الدكتورة قالتلها لازم نفسيتها تكون كويسة، لأن المرض ده بيهاجمها لما نفسيتها تكون وحشة، وإنت بتاع مشاكل وبنات وهتمرمطها يا شهاب، وهي مش حملك. فاطمة بقت أضعف كتير من زمان ومش حمل أي صدمة أو وجع.
شهاب: أقسم لك أنا مش هكون غير ليها. لا في يوم تحط إيدها ع وشها.
شهاب وهو بيمسك إيدها من ع وشها: طب اهدي طيب.
هند: خلاص يا شهاب.
شهاب: يا هند، إنتي بردوا حد مهم عندي ورأيك يهمني، وجيت بنفسي عشان أفهمك الفكرة اللي إنتي فهماها غلط عني، مش عشان أضايقك، وأنا والله مش وحش.
هند: أنا بس خايفة عليها.
شهاب: متخافيش، أنا هكونلها أمان، مش حد تخاف منه.
تشاورله بآه.
شهاب: فرفشي بقى يا قمر إنتي.
هند: خلاص مفيش حاجة.
شهاب: مينفعش العيون دي تعيط والله.
هند: ولاااا الكلمتين دول تقولهم لفاطمة، مبياكلش معايا أنا الكلام ده.
شهاب وهو بيقوم: ههههه ماشي يا عم الجاحد، أنا هروح أجيبلك شوكولاتة رشوة.
هند: لا مش عاوزة، تعالى.
شهاب: استني بس، أنا عارف إنكم بتوع بطنكم، أول ما تشوفيها هتحني ع طول.
هند: هههههه.
يمشي شهاب. تمسح هند دموعها، وبعدين تقوم تدخل المحل من جوة. في حنفية، تغسل وشها وترجع. يدخل شهاب.
شهاب وهو بيديها شوكولاتة: امسكي.
هند وهي بتاخدها: ميرسي ع الرشوة.
شهاب: ياريت بقى تكلمي أمك في الموضوع اللي باظ ده.
هند: لا دي كده طلعت رشوة بجد.
شهاب: أيوة، أومال إيه؟
هند: هكلمها أما أروح، حاضر.
شهاب: تسلملي يا قمر.
تبتسم له.
شهاب: عاوزة حاجة؟
هند: لا، سلامتك.
شهاب: سلام.
يمشي شهاب.
هند: سلام.
تروح هند وتتكلم مع مامتها إن شهاب كلمها وفهمها وخلاص كله تمام، وتوافق أمها إنه ييجي يتقدم.
تفرح فاطمة وتقول لشهاب.
هند واقفة في البلكونة، تدخل إسراء تقف جنبها.
إسراء: هو فعلًا شهاب كلمك؟
هند بتنهيدة: أيوة.. كلمني.
إسراء: وإنتي صدقتيه؟
هند: أنا مكدبتوش من الأول عشان أصدقه. هو آه بتاع بنات ومشاكل، لكن حوار الانتقام ده كله مش صح.
إسراء: بس إنتي عارفة معنى الكلام ده كده؟ إنه هييجي يتقدم وهيتجوز فاطمة.
هند: عارفة.
إسراء: طب وإنتي؟
هند: أنا إيه؟ أنا ولا حاجة بالنسباله.
