شهاب: مش مستاهلة والله.
كارمن بانفعال: اسمع كلامي بالله عليك، أنا أعصابي باظت.
شهاب: طيب اهدي، طيب خلاص.
تسنده تدخله البيت، يقربوا ع السلم.
شهاب: خليني هنا.
كارمن: عشان الدكتور أما ييجي هيكشف عليك ع الكنبة إزاي؟
يسكت شهاب، تسنده تطلعه أوضتها تنيمه ع التخت.
كارمن: هروح أتصل بالدكتور وأجيلك، متتحركش أوك؟
شهاب: أوك.
تروح كارمن تتصل بدكتور وبعدها ترجع لشهاب، تقعد جنبه.
كارمن: اتصلت بالدكتور، جاي.
شهاب بتعب وهو مغمض عيونه: أوك.
كارمن وهي بتحط إيدها ع خده: معلش، كل ده بسببي.
شهاب: إنتي ملكيش ذنب.
كارمن: يا ريتني روحت لوحدي.
شهاب: ده كويس إني كنت معاكي.
كارمن وهي بتمسلك شعره: هتكون كويس دلوقتي؟
شهاب مش مرتاح للمساتها نهائي، وفي نفس الوقت تعبان جدًا.
بعد ربع ساعة يوصل الدكتور ويخيط الجرح لشهاب. ينام شهاب من التعب.
ييجي الليل، يرن الفون بتاعه. تقرب كارمن تمسكه، تلاقي مكتوب فاطمة. تاخد الفون وتطلع من الأوضة.
كارمن: ألو.
تستغرب فاطمة.
فاطمة: مين معايا؟
كارمن: إنتي اللي مين؟
فاطمة: فين شهاب؟
كارمن: نايم.
فاطمة: نايم فين؟ هو مش في الشغل؟
كارمن: لا مش في الشغل.
فاطمة: ممكن تديله الموبايل؟
كارمن: لا مينفعش، قلتلك نايم.
فاطمة: طيب ياريت لما يصحى قوليله يكلمني.
كارمن: إن شاء الله.
تقفل كارمن.
فاطمة ع آخرها وعاوزة تعرف مين دي.
فاطمة: مقضيها الباشا.. ماشي يا شهاب.
شهاب في الأوضة يبدأ يصحى، يفتكر اللي حصل، يحط إيده ع دماغه.
شهاب بتعب: آآآه.
يقوم يقعد، تدخل كارمن.
كارمن: صحيت؟
شهاب: آه.
كارمن وهي بتقرب عليه: إيه اللي قومك؟ الجرح لسة جديد، ارتاح.
شهاب: هي الساعة كام؟
كارمن: ١٠ ونص.
شهاب: أحيه، أنا نمت كل ده!!!!
كارمن: أنا لقيتك تعبان، فسيبتك.
شهاب وهو بيقوم: لازم أروح.
كارمن: بات انهاردة.
شهاب: لا طبعًا، مينفعش أبات فين؟!!!!
كارمن وهي بتصده بإيدها: قلت هتبات، إنت لسة تعبان.
شهاب: كارمن بالله عليكي، مش قادر أناهد، سبيني أروح.
كارمن: عشان خاطري يا شهاب، خليك، متحسسنيش بالذنب.
شهاب: مفيش ذنب ولا حاجة، أنا عاوز أروح أغير هدومي وآخد دش من الدم ده، عاوز أرتاح مش أكتر.
كارمن: أنا هخليهم يجهزولك الحمام، وفي هدوم هنا بتاعة زوهير، وهريحك والله.
تحط إيدها ع كتافه.
كارمن: وكمان زوهير مسافر وهتكون براحتك.
تحط إيدها ع خده.
كارمن: خليك بقى.
يشيل إيدها من ع خده.
شهاب: مينفعش، قلتلك.
يسيبها ويمشي.
كارمن: المرة الجاية أجيب أجلك عشان تفضل معايا.
يمشي شهاب وهو تعبان، يركب مواصلات ويروح.
يوصل الشارع، فاطمة واقفة في البلكونة تشوف شهاب مقرب ع عمارته، دماغه عليها شاش ولزق وماشي مش مظبوط. تتخض وتنزل تجري ع تحت.
يكون شهاب دخل العمارة، تدخل وراه.
فاطمة: شهاااب!
يقف ويلفلها.
فاطمة: مالك؟ إنت كويس؟
شهاب: حادثة كده.
فاطمة: حصلك إيه؟!!!!
يحكيلها قاعدين ع السلم.
فاطمة: يبقى هي اللي ردت عليا.
شهاب: إنتي اتصلتي؟
فاطمة: أيوة، وقالتلي إنك نايم. حتى استغربت، نايم فين وإنت في الشغل المفروض!!!!
شهاب: آه، ما هي جابتلي دكتور في البيت عشان لو رحت مستشفى هيعمله محضر.
فاطمة: آه.. وإنت بقى كل ده كنت نايم عندها؟
شهاب: آه والله، نايم، أول ما صحيت، أو بمعنى أصح فوقت، مشيت.
فاطمة: ولسة تعبان؟
شهاب: بقيت كويس أما شوفتك.
تبتسم فاطمة.
فاطمة: سلامتك.
شهاب: الله يسلمك.. أنا عاوز أتكلم معاكي في موضوع.
فاطمة: موضوع إيه؟
شهاب: إنتي عرفاني.. وعارفة بيتنا وظروفنا ووضعنا كله.. وأنا بردوا عارف كل حاجة عنك.. حصل بينا مشاكل كتير وخناقات كتير، وقلينا أدبنا ع بعض كتير، ومكنتش بكره حد قدك إنتي واخواتك.. بس مكرهتش أمك صراحة، لأنها دايمًا كانت بتغلطكم، فكنت بفرح فيكم.
فاطمة: ههههه.
شهاب: فأنا بصراحة حاليًا ظروفي المادية اتحسنت ولميت إيدي شوية، وبقى معايا مبلغ كويس إني أقدر أبدأ بيه حياتي، وطبعًا شغلي مازال موجود.. فقررت أتجوز.
تفرح فاطمة من جواها.
فاطمة: لا بجد؟ مبروك.
شهاب: الله يبارك فيكي.. فبصراحة نفسي تكون البني آدمة اللي هكمل حياتي معاها من بيتكوا.
فاطمة باستهبال: بيتنا إحنا؟
شهاب: آه.
فاطمة: مين من بيتنا؟
شهاب: أختك هند.
تتصدم فاطمة وبطنها توجعها في ساعتها.
فاطمة: هند؟
شهاب: آه.. أنا بحبها.
فاطمة وهي بتقوم بعصبية: طب ما تقولها هي بتكلمني أنا لييييه؟
شهاب: عادي يعني، ما إنتي أختها، مرضتش أدخلها قفش كده، قلت أسألك إنتي الأول.
فاطمة وهي بتمشي: اعمل اللي إنت عاوزه.
شهاب: استني، رايحة فين؟
فاطمة: عاوز إيه؟ مروحة.
شهاب: هتفاتحي هند طب في الموضوع؟
فاطمة بانفعال: وأنا مالي؟ متدخلنيش بينكم.
شهاب: اهدي طيب، إنتي متعصبة ليه كده؟
فاطمة: ولا متعصبة ولا حاجة. هند عندك، قلها بنفسك اللي إنت عاوزه.
شهاب: وليه متساعدينيش طيب؟
فاطمة: هو إنت عيل صغير مش هتعرف تقولها؟ ده إيه الهم ده يا ربي.
تمشي، يمسك إيدها.
فاطمة وهي بتلف بعصبية وقربت تعيط: سيبني بقى! في إيه تاااني؟
شهاب: في إني بحبك إنتي.
فاطمة: لا إنت جايبني عشان تهزر بقى.
شهاب: والله ما بهزر، أنا بحبك إنتي، مش هند.
فاطمة بارتباك: أومال.. أومال قلت هند ليه؟
شهاب: عشان أنا مش عارف رد فعلك إنتي هيكون إيه.. خفت ترفضي أو تكوني مش قبلاني عشان اللي فات.
فاطمة: بس اللي فات خلاص فات.
شهاب: أفهم من كده إيه؟
فاطمة وهي بتمشي: أيا كان بقى.
شهاب وهو بيمسك إيدها وبيشدها: لا استني، استني معلش.
فاطمة بإحراج وهي بتشيل إيدها: إيييه؟
شهاب: يعني لو اتقدمتلك هتوافقي؟
فاطمة بتكبر: والله مش عارفة، هفكر وقتها.
شهاب: يرااااجل!
فاطمة: أيوة طبعًا.
شهاب: لا خلاص، نرجع لهند بقى.
فاطمة: إنت رخم أوي ع فكرة.
شهاب: بس بحبك والله.
تبتسم فاطمة بكسوف.
شهاب: أنا عاوز أتجوزك.
فاطمة: إيه الدخلة دي؟
شهاب: ما أنا لفيت ودورت كتير ومش عاوز أكون كده معاكي. أنا عاوز أدخل البيت من بابه، فردي عليا بصراحة وبجد، موافقة ولا لأ؟
تسكت فاطمة متوترة.
فاطمة: تعرف إن ده كان هيبقى أبشع يوم في عمري لو كنت فعلًا بتحب هند.. لأن إزاي هيكون في مشاعر جوايا لخطيب أختي أو جوزها؟ مكنتش عارفة هتصرف إزاي لو ده بجد.
شهاب: يعني إنتي في جواكي مشاعر ليا؟
تتحرج ومتردش.
شهاب: لا ما إنتي تنطقي بقى، عشان أنا تعبت والله.
فاطمة: هههههه.
شهاب: إيييه؟
فاطمة: يا سيدي أيوة.
شهاب: أخيرًا، يا ساتر عليكي وع بخلك.
فاطمة: يعني إنت بجد مبتحبش هند؟
شهاب: إنتي هبلة يا بت؟ هند دي زي أختي. أنا قلتلك، كنت بختبرك بس عشان أطمن.
فاطمة بارتياح: الحمدلله.
شهاب: الحمدلله، هااا؟
فاطمة: خلااااص.
شهاب: عاوزك تفاتحي أمك في الموضوع، وأنا هفاتح أبويا، وبعدين هقولك هنيجي إمتى.
فاطمة بفرحة: أوك.
يرن فون شهاب، يلاقيها كارمن، يعمله صامت.
فاطمة: هروح أنا عشان محدش يعرف إني نزلت، وإنت اطلع ريح بقى.
شهاب: طب مفيش حاجة قبل ما تطلعي؟
فاطمة: حاجة إيه؟ اتلم.
شهاب: يما مش اللي في دماغك.. يعني كلمة حلوة تطمني.
فاطمة وهي ماشية: تصبح ع خير.
شهاب بصوت عالي: مفيش أحلى من كده صراحة.
فاطمة: هههههه.
تجري فاطمة ع عمارتهم وتطلع.
ويطلع شهاب البيت. هند كانت واقفة في البلكونة وشيفاهم. تدخل جوة. يدخل شهاب أوضته، يدخل ياخد دش ويغير هدومه، ويترمي ع تختِه من التعب.
يخطر ع باله ليه وهو عند كارمن وقت ما كان نايم. تدخل كارمن الأوضة وتقرب عليه وهو ما بين النوم والصحيان من التعب، تقعد جنبه وتحط إيدها ع دماغه وتقرب تبوسه.
شهاب: هي الضربة أثرت ع دماغي ولا إيه؟
ينام شهاب وفي باله إن ده كان حلم أو بيتهيأله من البنج اللي أخده، وموضوع فاطمة يغطي ع كل ده ويشغل تفكيره.
تنام فاطمة وهي من الفرحة، وحرفيًا ده أحلى يوم في عمرها.
تاني يوم شهاب قاعد مع أبوه.
الأب: ابقى خلي بالك، ولو توصيلك ليها هيجيبلك المشاكل، ابقى اتحجج لها بأي حجة. مش ناقصين يجيلك مصيبة أمك تروح فيها.
شهاب: ماشي، سيبنا من الموضوع ده. أنا عاوزك في موضوع تاني أهم.
الأب: خييير؟
شهاب: أنا عاوز أخطب.
الأب: لا والله!!!!
شهاب: والله.
الأم وهي داخلة: ده مين دي اللي أمها داعية عليها؟
شهاب: فاطمة بنت أم هند.
الأب: اللي كل شوية أخواتك متخانقين معاها؟
شهاب: أيوة، بس كان الكلام ده. دلوقتي كلهم سمنة ع عسل ومفيش أي مشاكل.
الأم: والله بنت جدعة، مش هنسالها اللي عملته معايا.
الأب: بس ده إيه اللي خلاك تفكر في دي بالذات؟
شهاب بتوتر: آآ عادي يعني، أنا قلت عارفينهم، وهي بقت كويسة معانا هي وأهلها، وغلابة يعني ومننا.
الأب: والنبي إنت اللي غلبان. دول ياكلوك وياكلوا عشرة زيك.
شهاب: ما هو ده اللي عاجبني، أنا عاوز واحدة تاكل عشرة زيي، بس في غيابي.
