يمشوا.
تاخد هند نفسها وتروح تقعد الكنبة. يقرب شهاب عليها.
شهاب: إنتي كويسة؟
هند: دماغي مش قادرة.
فاطمة وهي بتهبد ع الباب: يا هند افتحييي!
هند وهي بتدي لشهاب المفتاح: افتحلها والنبي.
شهاب: حاضر.
ياخد منها المفتاح ويقرب ع أوضة فاطمة يفتحلها، تتخض فاطمة أما تشوفه، لابسة بيجامة بادي وهوت شورت، تقفل الباب تاني في وشه. يرجع شهاب لهند.
هند: مطلعتش ليه؟
شهاب: آآ جاية أجبلك حاجة ولا أعملك حاجة؟ ننزل مستشفى.
هند: لا أنا كويسة، مش مستاهلة.
شهاب: هو حصل إيه؟
هند: الباب خبط، رحت أفتح لقيتهم هما زقوني ونزلوا فيا ضرب. كانت فاطمة نايمة، جريت من تحت إيديهم قفلت عليها عشان عارفة إنهم جايينلها هي، مش أنا.
تقرب فاطمة بعد ما غيرت هدومها.
فاطمة: بتحبسيني لييييه!!!
هند: عاوزاني أسيبهم يدخلوكي وإنتي عيانة؟ يجيبوا أجلك.
فاطمة: كنا هنصد سوا أحسن ما تكوني لوحدك.
هند: ربنا سترها خلاص.
فاطمة: إنت كنت معاهم ولا إيه!!
شهاب: لا، أنا كنت نايم، قمت ع صوت صريخ هند.
فاطمة: هو عاوز إيه مني ده؟ مش عارفة أنا!!!
هند: إنتي ولا اللي قتلته قتيل.
فاطمة: أنا هروح أتكلم معاه.
شهاب: تكلمي مين؟ إنتي اتهبلتي؟
فاطمة: أومال أسيبه يطيح فينا هو وأهله!!
شهاب: سيبيلي أنا الموضوع ده.
فاطمة: لا بلاش، إنت مبتتفاهمش وهيحصل مصيبة المرة الجاية.
شهاب: لا، أوعدك إني هتكلم معاه بتفاهم، بس هتكون آخر مرة أتكلم معاه أصلًا فيها.
بعد يومين، فاطمة قاعدة مع صحابها في كافيه، يرن فونها.
فاطمة: إيه فينك.. بجد جبته.. في الكافيه اللي بقعد فيه.. طب ماشي مستنياك.. باي.
تقفل فاطمة.
سلمى: ده شهاب؟
فاطمة: آه.
علا: هو إيه الحكاية؟ ده كان بيكرهك، إيه اللي جراله بقى؟ لازقلك كده!!!
فاطمة: كااان بيكرهني.
يفرمل شهاب قدامهم بمتوسيكل. تشوفه فاطمة تقوم تقرب عليه.
شهاب: إيه رأيك؟
فاطمة: حلو أوييي.
شهاب: بجد؟
فاطمة: آه والله جميل، بس خلي بالك وإنت سايق، ملهوش أمان.
شهاب: طب يلا اركبي.
فاطمة: أركب إيه!!!!!
شهاب: اركبي يا بنتي ورايا.
فاطمة: لا أنا بخاف، أنا عمري ما ركبته.
شهاب: مش بيخوف، أنا بعرف أسوق كويس. اركبي يلا عشان تكوني أول بنت ركبته معايا.
فاطمة وهي بتربع إيدها: إيه أول بنت دي؟ هو في غيري هيركبه؟
شهاب: لا يا عم مفيش غيرك، يلا اركبي هيعجبك.
فاطمة: ماشي، بس سوق براحة والنبي.
شهاب: حاضر.
تركب فاطمة ورا شهاب.
شهاب: امسكي كويس.
فاطمة: أمسك فين؟
شهاب وهو بيلف إيدها حوالين وسطه: فيا.
تتحرج فاطمة.
فاطمة: مفيش حتة تانية؟
شهاب: لأ.
يطلع مرة واحدة يخضها، تمسك فيه أكتر.
فاطمة بصريخ: براحااااااا!
شهاب: هههههه اهدي.
فاطمة: براحة والنبي.
شهاب: متخافيش والله.
تمسك فيه أكتر وتبدأ تأمن.
شهاب: إيه؟
فاطمة: حلو.
شهاب: قلتلك هيعجبك ومش بيخوف.
فاطمة: لا هو يرعب مش يخوف، بس شكلك بتعرف تسوق.
شهاب: مطمنة يعني؟
فاطمة: آه.
يلف يمين مرة واحدة.
فاطمة: عاااا متفاجئنييييش!
شهاب: هههههه حاضر.
فاطمة: والله أنط.
شهاب: تنطي إيه؟ هو أنا خاطفك؟
فاطمة: يبقى سوق براحة.
شهاب: حاضر.
يفضلوا ماشيين والشوارع شبه فاضية، ف واخدين راحتهم في السواقة. يوصلوا قرب شارعهم.
فاطمة: نزلني هنا بقى عشان لو دخلنا كده هتنزف جوة.
شهاب: آه والله.
يقف شهاب وتنزل فاطمة.
شهاب: يلا ادخلي قدامي.
فاطمة: أوك.
تاني يوم بالليل، شهاب واقف مع عصام في الشارع.
عصام بانفعال: نعم يا خويا؟ حبيت مين؟
شهاب: اهدى بس ووطي صوتك.
عصام: يا عم إنت مش قلت هتعلمهم الأدب وهتعمل وتسوي وهتنتقم؟ حب إيه بقى اللي حبيتهولها؟
شهاب: انتقام إيه يا عم وخرة إيه؟ دي خناقات ستات، وهي كان لسانها طويل معايا عشان كنت داخل فيهم شمال، لكن لما أنا اتعدلت معاهم هما اتعدلوا وكويسين مع أهلي كمان.
عصام: يعني اللي بينك وبينها مش تسلية أو لعب؟
شهاب: لا، أنا بحبها وعاوزها.. عاوز أتجوزها.
عصام بضحك: أحيه عليك، ده إنت ضايع ع الآخر.
شهاب: بصراحة آه.. مؤخرًا يعني، وبالذات لما فاطمة تعبت.. حسيت إنها كانت من مسؤوليتي يوميها وشايلها ولف بيها زي العيلة الصغيرة.
عصام: خلاص يا عم دوس، هما برضوا بنات محترمة، محدش يقدر يقول في حقهم حاجة وحشة.. آه لسانهم طويل حبتين، بس إنت بقى قصروه.
شهاب: وحياتك قصرتوه.
عصام: طب وهيثم هتعمل معاه إيه؟
شهاب باستغراب: إيه اللي دخل هيثم في الموضوع؟!
عصام: إنت متعرفش إنه من كام يوم، اليوم اللي فاطمة تعبت فيه، كان عندهم.
شهاب: أيوة عارف، ومستني أشوف خلقته من ساعتها.
عصام: عاملي فيها نحنوح وطالع يطمن عليها، اهو خد ع دماغه.
شهاب: هو شكله مش عاوز يلمها.
عصام: فكك، هو اتظبط، بس بردوا حرص منه.
شهاب: لا مش هفكني، بس أشوفه.
تعدي الأيام.
في شركة كارمن، كارمن في مكتبها وشهاب برة في مكتبه بيتكلم في الفون. يرن فون المكتب.
شهاب: ثواني.. أيوة.
كارمن: إيه يا بيبي تعلالي.
شهاب باستغراب: بيبي!!!!
كارمن: يا بابا تعالى.
شهاب وهو بيبص للفون: بابا مين؟
كارمن بانفعال: يا بني تعلالي أخلص.
شهاب: طيب ماشي.
يقفل شهاب.
شهاب: بصي ورايا شغل هخلصه وأكلمك.. باي.
يقوم يدخلها.
شهاب: نعم؟
كارمن: ساعة يا شهاب عشان تيجي.
شهاب: معلش.
كارمن: فاضي توصلني عشان السواق مشي؟
شهاب: أنا بس كان عندي شغل و…
كارمن وهي بتقوم: مش مهم يا شهاب، كمله لما ترجع. يلا.
شهاب: طيب.
تمشي كارمن ويروح شهاب وراها، ينزله من الشركة.
كارمن: بتاع مين الريس ده؟
شهاب: بتاعي.
كارمن: لا بجد؟ جبته إمتى؟
شهاب: من كام يوم كده.
كارمن: مبرووك.
شهاب: الله يبارك فيكي.
كارمن: مش هتوصلني بيه بقى؟
شهاب بارتباك: آآ…
يفتكر شهاب إنه قال لفاطمة مفيش بنت غيرها هتركبه.
كارمن: مش حاببني أركب؟
شهاب: بصراحة لأ، إنتي لابسة جيبة قصيرة، فمينفعش، ده عاوز بنطلون.
كارمن: أيوة صح.. طب خلاص خليها مرة تانية.
شهاب: أوك.
يركبوا العربية ويمشوا، يقفوا في إشارة، تضغط كارمن ع زرار تفتح سقف العربية.
كارمن: الجو حر انهاردة.
شهاب: آه.
عربية تانية تقف جنبهم فيها شابين مشغلين مهرجانات، وفي إيدهم سجاير، وخربانين ع الآخر. يلمحوا كارمن.
الأول: ولا بص.
الثاني: تمام.
تتفتح الإشارة، يمشي شهاب والعربية التانية وراه. يوصلوا قرب بيت كارمن، تسرع العربية التانية وتفرمل قدام شهاب تخليه يقف.
كارمن: إيه ده!!!!
ينزلوا الشابين من العربية ويقربوا عليهم. يفهم شهاب من دخلتهم إنهم مش متظبطين، ينزل من العربية.
كارمن بقلق: شهاب رايح فين؟
ميردش عليها.
شهاب: إيه الدخلة دي يا عم؟
الأول: لامؤاخذة، بس المزة دي تلزمنا.
تتخض كارمن.
شهاب: لا فعلًا، دخلاتك دخلات دماغ عالية أوي!!
الثاني: ولسة هتعلى أكتر بوجود المزة.
يرعب كارمن أكتر وتقفل سقف العربية.
شهاب وهو بيزق الشاب في كتافه: طب اتكلوا ع الله بقى.
الأول بضحك: كده يا بني خفت؟ المزة أهي قفلتلك السقف.
الثاني: ده عز الطلب.
يقربوا ع العربية، يصدهم شهاب.
شهاب بزعيق: قلت اتكلوا ع الله! إنتوا مبتسمعوووش؟
الأول وهو بيطبطب ع خد شهاب: اتكل إنت ع الله وعدي ليلتك.
يزق شهاب إيده ويضربه بالبوكس، يردهوله الشاب. يقوم شهاب ضاربه. يستغل التاني إن شهاب ملهي ويقرب ع كارمن. تصرخ كارمن وتتربس باب العربية، بس متلحقش تقفل إزاز الشباب يدخلها منه. تصرخ، ينتبه شهاب، يسيب الشاب ويجري ع التاني، يشده يخرجه من العربية وينزل فيه ضرب. يكون التاني جاب إزازة بيرة فاضية من العربية ويضرب بيها شهاب، يكسرها ع دماغه. يمسك شهاب دماغه ويقع في الأرض.
كارمن بصريخ: شهاااااب!
الأول: الله يخربيتك هببت إيه؟
يجروا يركبوا عربيتهم ويمشوا.
تنزل كارمن تجري ع شهاب.
كارمن: شهاب، إنت كويس؟
شهاب: أنا كويس.
كارمن وهي بتسنده: قوم معايا.
يقوم تسنده، تركبه العربية وتسوق هي.
كارمن: هوديك مستشفى.
شهاب: لا لا، مفيش داعي.
كارمن: مفيش داعي إيه؟ دماغك بتنـزف.
شهاب: هيبقى فيها سين وجيم ومحضر، والموضوع مش مستاهل. خلينا نروح بس.
كارمن: طيب خلاص.
يوصلوا عند بيتها، تنزل كارمن وتلف ناحية شهاب.
كارمن: انزل معايا.
شهاب: طلعيني برة بس، أخد تاكسي.
كارمن: تاكسي إيه؟ إنت هتدخل البيت وهجيبلك دكتور هنا.
