سو: اتفضلي اطلعي برة.
يقرب البادي جارد ع سو ويجيبها من شعرها ويقعدها تحت رجل كارمن.
سو بصريخ: آآآه.
كارمن: لما أقولك اقعدي، عاوزاكي تقعدي من سكات، فاهمة؟
سو: حاضر حاضر، خليه يسيبني.
تبصله كارمن، يسيبها.
كارمن وهي بتولع سيجارة: قومي اقعدي بكرامتك أحسن.
تقوم سو تقعد قصاد كارمن.
سو: إنتي مين وعاوزة إيه مني؟
كارمن: بصي يا سو، أنا كارمن بنت خالة شهاب.
سو: اللي بيشتغل عندها؟
كارمن: بالظبط.
سو: وعاوزة إيه مني؟
كارمن: أنا عارفة اللي بينك وبين شهاب.
سو بتوتر: عارفة؟
كارمن: أهااا عارفة طبعًا.. أنا عارفة كل حاجة عن شهاب.. وسيباكوا تلعبوا عشان عارفة آخرك معاه.
تتنهد سو.
كارمن: لكن هيكون ليا أنا في الآخر.
سو: ريحي نفسك، ولا ليا ولا ليكي، هو بقى لخطيبته وبس.
كارمن: هو قالك إنه خطب؟
سو: أيوة قالي.
كارمن: وطبعا قطع علاقته بيكي وسابك زي الكلبة من وقتها.
سو بغيظ: إنتي جاية عاوزة إيه بالظبط؟
كارمن: اللي خطبها مش بس خدته منك، دي خدته مني أنا كمان.
سو: هو إنتي وشهاب…………
كارمن بحدة: ميخصكييييش.. إنتي تعملي اللي هقولك عليه وبس، وصدقيني ده فيه فايدة ليا وليكي.. يمكن يرجعلك وقتها.
سو: إنتي عاوزاني أعمل إيه؟
**باااااك**
سو: قالتلي أخليك تيجي وأصورك، وخلت الرجالة اللي معاها يحطوا الكاميرا.. وإنت كنت قطعت علاقتك بيا وقتها، فمعرفتش أجيبك غير بموضوع إني أذيت نفسي، وجيت.. بس والله مرضتش في الأول ورفضت، بس هي هددتني إنها هتخلص عليا أو بدل ما أكون معاك هتصورني مع رجالتها وتفضحني.. فخفت.. خفت والله يا شهاب، أنا مش قدها.. أنا آسفة والله، بس مكانش قدامي حل تاني أحمي بيه نفسي مش أكتر.
شهاب: أنا مش عارف أقولك إيه.. بجد أنا مش عارف أقول إيه ولا أعمل إيه.. انبسطوا إنتوا الاتنين، كنتوا عاوزين تفرقوا بينا، وأديكوا فرقتوا.. بس أنا استاهل.. استاهل عشان خفت عليكي وجيت أجري زي الأهبل أشوفك.. وغلطت عشان جرجرتيني للقرف تاني بعد ما خلاص قلت أنا نضفت.. بس تصدقي.. أنا كمان غلطان إني مشيت صح.. بس وحياة اللي خسرتها بسببكوا، لهخلي حياتكوا سواد زي ما سودتوها عليا.
يقوم شهاب يمشي.
يرن الفون بتاعه.
شهاب: ألو.
هدير: شهاب إنت فين؟
الاب بزعق: قوليله يجييييييي!
شهاب بقلق: في إيه يا هدير؟ أبوكي ده اللي بيزعق؟
هدير: أيوة بابا.
شهاب: حصل إيه!!!!!
هدير: في حد بعت لبابا فيديو ليك مع واحدة، وبعتهولي وبعته لوجدان.
شهاب بخضة: يا نهار أسود.
هدير: بابا ثاير في البيت من وقتها وعاوزك.
شهاب: طب أنا جاي جاي، سلام.
يقفل شهاب ويركب متوسيكلته ويمشي.
فاطمة نايمة عمالة تعيط.
هند: فاطمة إنتي صاحية؟
فاطمة: أيوة.
هند: إنتي كويسة؟
فاطمة بعياط: إنتي شايفة إيه؟
هند: عشان خاطري متزعليش، أكيد في سوء تفاهم.
فاطمة وهي بتقوم بانفعال: سوء تفاهم إيه؟ دي حتى الصور اللي مبعوتالهم سوا كان لابس فيها الهدوم اللي كان عندي بيها.. اللي يومها قالي رايح المكتب وراه حاجات.. يعني كدب عليا عشان يروح يخوني.. بزمتك المنظر اللي شوفتيه ده ينفع يكون سوء تفاهم؟ ينفع ردي عليا.
هند: مينفعش يا ستي، بس متعمليش في نفسك كدة واهدي.
فاطمة بعياط: أنا تعبانة.. تعبانة أوي.. شهاب كسرني يا هند.. ياريتني سمعت كلامك.. ياريتني سمعته.. ياريتني موافقتش عليه.
يوصل شهاب قدام البيت، يطلع البيت وهو مرعوب من جواه، اتفضح قدام أهله، مش بس خطيبته، هيواجه كل ده إزاي؟
يخبط ع الباب، تفتح هدير، يدخل، يبص لأباه والكل قاعدين، يقوم أبوه يقف.
الأب: خشوا جوة.
الأم: يا سلطان………
الأب بزعق: خشوا جواااااا!
يدخلوا جوة ويسيبوهما سوا.
يمسك الأب الفون، يشغل الفيديو ويوجهه قصاد شهاب.
الأب: إيه ده؟
ميردش شهاب، مش عارف يقول إيه.
الأب وهو بيضربه بالقلم: انطقققق!
شهاب: غلطة.
الأب: غلطة يا بن الكلب!
ينزل فيه ضرب، تطلع أمه وأخواته يحوشوه.
الأم: خلاص يا سلطان، أبوس إيدك.
سلطان وهو بيزقها: أوااااااي!
الأب: مينفعش تضربه، هو مش صغير.
عند فاطمة تدخل إسراء.
إسراء: هو في إيه يا فاطمة؟ أبو شهاب نازل فيه ضرب وزعيق والبيت مولع!!!!
تتخض فاطمة وهند.
هند: هو أبوه عرف ولا إيه!!!!
فاطمة: مش عارفة.
عند شهاب.
هدير بعياط: خلاص يا بابا والنبي.
الأم: طيش شباب يا خويا والله، وهي أكيد آخر مرة.
سلطان: من بعد النهاردة لا إنت ابني ولا عاوز أعرفك، والبيت ده لو خطيته تاني هقطعلك رجلك، فااااهم؟
يتخض شهاب.
الأب وهو بيزقه برة: غوووور.. عرتنا يا بن الـ… يلا!
يزقه برة البيت ويقفل الباب في وشه.
يقعد شهاب ع السلم مش عارف يعمل إيه، اتقفلت في وشه من كل ناحية.
تنزل دمعة من عينه، يمسحها ويقوم ينزل تحت.
فاطمة وأخواتها واقفين في البلكونة، يبصلهم شهاب، تبصله فاطمة وبعدين تدخل جوة، ويدخلوا وراها أخواتها.
يمسك شهاب الفون فوق، يرن فون فاطمة.
إسراء: ده هو.
فاطمة: هو.
إسراء: طب م تردي عليه شوفي حصل إيه.
فاطمة تبص لهند.
إسراء: هو في إيه؟ إنتوا متخانقين إنتوا كمان؟
هند: متخانقين يا إسراء.
يرن ع فون هند.
هند: ده شهاب.
فاطمة: ممكن تسيبوني أنام؟ لو سمحتوا اطلعوا برة.
تنام فاطمة وتغطي وشها.
تخرج هند وإسراء من الأوضة.
يرن فون هند تاني.
هند: ألو.
شهاب: إيه يا هند؟
هند: إيه يا شهاب؟
شهاب: هي مش عاوزة ترد عليا.
هند: ده الطبيعي يعني، هترد عليك إزاي بعد اللي حصل!!!
يسكت ثانيتين.
شهاب: يا هند والله كان غصب عني.
هند: متحلفش، بس إنت راجل يا شهاب ومحدش يقدر يغصبك ع حاجة زي كدة.
شهاب: مش ده قصدي.. أنا البنت دي أعرفها ومش هكدب، أنا كنت مصاحبها بس والله قبل ما أخطب فاطمة، ومن ساعة ما دبلتها اتحطت في إيدي ولا خنتها ولا عرفت بنات تاني.
هند: كداب، أومال دي جت منين؟ واللي حصل بينكم ده؟ إحنا شوفناك يا شهاب في حضنها وفي وضع زي الزفت، متلفش وتدور.
شهاب: يا بنتي والله قطعت علاقتي بيها، بس هي اليوم اللي مشيت فيه من عندكم اتصلت بيا وعمالة تصرخ: الحقني، أنا أذيت نفسي. فأنا بطيبتي رحت عشان عارف إنها عايشة لوحدها ولو فعلًا عملت كدة ممكن يحصلها حاجة ومحدش يحس بيها، مرضتش أشيل ذنبها، والله رحت بنية صافية ووالله مفيش في بالي أي حاجة وحشة، ولقيتها فعلًا قاطعة إيدها ومڼهارة.. فضلت معاها عشان متكررهاش تاني، بس معرفش إن ده هيكون آخره.
هند: ماشي يا سيدي، مصدقاك ومصدقة نيتك الكويسة لما رحتلها، بس كان إيه آخره؟ كنت في حضنها في الآخر، فما زالت خنت وما زالت كسرت فاطمة.
شهاب بزعل: عارف.. عارف، ووالله ندمان.. أنا عملت حاجات كتير في حياتي غلط وزفت، بس وربي دي أكتر مرة ندمان فيها، ووالله مقهور من جوايا إني جرحتها كدة.. ومش عارف أعمل إيه عشان ترضى عني تاني.. كلميها والنبي يا هند أو اديها الموبايل أكلمها.
هند: مش راضية والله، دي طردتنا من الأوضة ونامت لما إنت اتصلت.
شهاب: هند والنبي اعملي أي حاجة، أنا عفاريت الدنيا كلها بتتنطط في وشي وربي، ولو خسرت فاطمة بجد مش هبقى ع أي حاجة تانية في حياتي وهضيع وربي.
هند: والله أنا لو بإيدي حاجة أعملها هعملها، بس زي ما إنت شايف الموضوع لسة في أوله وهي مش هتصفى بسهولة كدة، ده لو صفت أصلًا.
تطلع فاطمة من الأوضة منهارة من العياط.
فاطمة بعياط: إنتي لسة بتكلميه؟
هند: آه.
فاطمة: هاتيه.
تديها الفون.
فاطمة بزعق: إنت عاوز مني إيه تاني؟ هاااا؟ عاوز إيييييه؟
شهاب: فاطمة………
فاطمة: سيبني في حالي بقا، مش خلاص عملت اللي إنت عاوزه وقهرتني وانتقمت لأمك وأخواتك؟
شهاب: إيه اللي بتقوليه ده!!!!
فاطمة: أقول إنك انتقمت مني أحسن ما أقول إني حبيتك وكسرتني.. أحسن ما أقول إني كنت مصدقة حبك ليا وطلع كدب.. ابعد عني بقا بالله عليك، إنت لو آخر بني آدم في الكون ده عمري عمري عمري ما هرجعلك يا شهاب، ولا تطول مني شعرة. إنت آخرك الأوخ اللي تعرفهم اللي من كلمة يبقوا في حضنك.. روح لكارمن، هتتجنن عليك ع فكرة، لكن أنا تنساني تمحيني كدة من حياتك، فاااهم؟
تقفل الفون في وشه.
فاطمة وهي بتنهج: لو رديتي عليه تاني.. لا إنتي أختي ولا أعرفك يا هند.
هند: طب ممكن تهدي؟ هتموتي من القهرة كدة.
فاطمة بعياط: أغور في ستين داهية، سيبوني.
تدخل أوضتها.
في الشارع، شهاب واقف عند المتوسيكل بتاعه والفون في إيده، تنزل دموعه، يمسحها ويمشي.
يروح المكتب، يقعد هناك.
يعدي الوقت ويعدي اليوم، وشهاب ما زال في المكتب، كل اللي بيعمله باصص للفراغ وبيشرب سجاير.
شهاب في باله: روح لكارمن، هتتجنن عليك ع فكرة.. روح لكارمن، هتتجنن عليك ع فكرة…………
يمسك الفون بتاعه ويتصل بسو.
سو: شهاب.
شهاب: لو جبتي سيرة لكارمن إني عرفت إنها هي اللي ورا الفيديو ده، هتقومي الصبح تلاقيه منتشر ع كل موبايل في مصر، حتى بواب عمارتك.
سو: أنا مقدرش أقولها إني قلتلك، دي تخلص عليا.
شهاب: تمام.
يقفل في وشها.
يطلع الصبح.
في شركة كارمن، كارمن قاعدة في مكتبها وفجأة يدخل شهاب مرة واحدة.
السكرتيرة: يا أستاذ مينفعش كدة!!!!
كارمن: روحي إنتي.
تخرج السكرتيرة.
كارمن: من الذوق إنك كنت تخبط ع الباب الأول.
شهاب: أبويا طردني.
كارمن بسخرية: يا حرااام، طردك لييييه؟
شهاب: كنت أعرف بنت وصورتني معاها وبعتت الفيديو لأبويا وأخواتي.. حتى خطيبتي وسابتني.
كارمن: وجايلي ليه بقا إن شاء الله؟
شهاب: ملقتش مكان أروحه غير عندك.
كارمن بانتصار: مش قلتلك هتجيلي راكع؟
شهاب: تمام، هنمشيها ذل يعني عشان جتلك.
لسة هيمشي.
كارمن: استنى.
يقف، تقوم كارمن تقرب عليه.
كارمن: متزعلش، أنا بس مش مصدقة إنك رجعتلي.
يقعد شهاب.
شهاب: كل حاجة باظت.. حياتي كلها اتهدت.
تقعد قصاده ع الترابيزة وتمسك إيده.
كارمن: كل اللي اتهد ده هنبنيه تاني سوا، متقلقش.
شهاب: لسة عوزاني بعد كل اللي قلتهولك؟
كارمن: اللي قلتهولي ده علقني بيك أكتر، مبعدنيش.. عرفت إنك راجل بجد ومش أي بنت تعجبك مهما كانت حلوة، وده عجبني فيك أكتر.
يبوسها.
كارمن: استنى لحد يشوفنا زهير، مسافر مش هيرجع قبل الأسبوع الجاي.. هتقعد معايا في الفيلا النهاردة بس أكون بعت الشغالين ينضفوا الشقة بتاعتي، وبعدين هنروح نقعد فيها، زهير ميعرفش عنها حاجة.
شهاب: هتطلقي؟
كارمن: أول ما ييجي هطلب الطلاق.
شهاب: أيوة أنا مش هستحمل تكوني في حضن حد غيري.
كارمن: متقلقش، هكونلك لوحدك.
في بيت فاطمة، نايمة.
تدخل الأم.
الأم وهي بتفتح البلكونة: فاطمة.. فاطمة قومي يا ماما، كفاياكي نوم، هند نزلت.
فاطمة وهي بتتقلب: آآآه.
الأم: إيه مالك؟
فاطمة: آآآه.
الأم: في إيه يا بت؟
فاطمة بعياط: جسميييييي.. آآه.
الأم: اهدي طيب.
تقرب تشوفها، وفاطمة عمالة تعيط من وجع جسمها.
يجي الليل، تدق الساعة ٤ الفجر، يقوم شهاب من جنب كارمن، يلبس هدومه بهدوء وينزل تحت.
يدخل المكتب، يلاقي اللاب توب ع المكتب، يقعد ويفتحه ويدور ع الفيديوهات بتاعة كارمن.
يلاقيها، يبتسم ويقفل اللاب وياخده ويمشي.
من الفيلا.
عند فاطمة، مسنداها هند عشان تدخلها الأوضة.
