
فاطمة بعياط: براحة أبوس إيدك، براحة.
هند: حاضر والله.
فاطمة: آآآه.. آاه مش قادرة.
هند: معلش معلش، وصلنا خلاص.
يدخلوا الأوضة، تنيمها ع السرير، تتفتح فاطمة في العياط.
هند: بالله عليكي بطلي بقا.
فاطمة: آآآه آآآه.. آه مش قادرة من الوجع.
هند: مهو كل ما نفسيتك زفت كدة هتفضلي موجوعة.
فاطمة بعياط: الوجع في قلبي.. في قلبي هيهلكني.. وحش أوي وجع الخيانة ده يا هند.. وحش أوي إنك تحسي إنك كنتي ولا حاجة عند أكتر بني آدم حبيته.. وحش إنك كل حاجة تتهد فوق دماغك لما يكسرهالك.. وحش إن سبب وجعك صعب تسامحي فيه.
تاخدها هند في حضنها.
عند كارمن، تصحى من النوم، تبص جنبها متلاقيش شهاب، تستغرب تقوم تقعد.
كارمن: شهاب!!!
محدش يرد.
تقوم تبص عليه في التواليت، متلاقيهوش، تبص ع الكرسي متلاقيش هدومه.
تنزل تحت، تطلع من الفيلا، متلاقيش متوسيكلته.
تعرف إنه مشي، ترجع تدخل.
كارمن باستغراب: مشي ليه من غير م يقول!!!!
تطلع فوق تتصل بيه تلاقيه مقفول، ترمي الفون ع وتدخل تاخد دش.
شهاب واقف في محل عصام، محل موبايلات.
عصام: يعني إنت عاوز الفيديوهات اللي هنا أحطهالك ع فلاشة؟
شهاب: أيوة، بس تنسخها متنقلهاش.
عصام: ماشي، بس دول مساحتهم كبيرة، هيحتاج فلاشة كبيرة.
شهاب: إن شاء الله مليون جيجا، أخلص.
عصام: ماشي طيب.
شهاب: دقيقتين وجايلك.
عصام: ماشي.
يقرب ع هند يرفع معاها باب المحل.
تبصله هند.
شهاب: عاملة إيه؟
هند: الحمدلله.
شهاب: فاطمة.. كويسة؟
هند: مبتتحركش من السرير.. جيلها شبه شلل بسبب تعبها.
يتخض شهاب.
هند: وبسببك.
يشاورلها بآه.
شهاب: أنا بجد أوخ بني آدم ع وجه الأرض.
هند: م أنا سألتك وقتها وقلتلك مش هتأذيها يا شهاب، قلتلي لا يا هند.. أنا لما بحب مبعرفش أأذي.. وأديك أذيت يا شهاب.
تدخل هند المحل.
يتنهد شهاب ويحط إيده ع دماغه ويرجع لعصام.
شهاب: خلصت؟
عصام: بيحملوا، أتقل شوية.
شهاب: تقدر تخليهولي عندك؟
عصام: آه عادي.. هو بتاع مين؟
شهاب: واحد صاحبي.
عصام: ماشي.
يطلع شهاب الفون من جيبه ويفتحه.
تدخل كارمن المكتب وتقعد، تفتح الخزنة وتطلع منها رزمة فلوس وتحطها ع المكتب.
تلاحظ إن اللاب مش موجود.
تستغرب، تدور عليه في المكتب كله، متلاقيهوش.
كارمن: يمكن نسيته في الشركة.
تفتكر شهاب، تتخض.
كارمن: يا بن ال…
تمسك الفون بسرعة وتتصل بيه.
شهاب في المكتب بتاعه، بس مشتغلش بيبات فيه، يرن فونه.
شهاب: ألو.
كارمن بزعق: بتسرقني يا شهاااااب؟
شهاب: تؤ تؤ تؤ.. لا حول ولا قوة إلا بالله، إنتي اتسرقتي؟
كارمن: إنت هتستهبل يا روح أمك؟
شهاب: لا لا متشتميش برستيچك يا كارمن هانم.
كارمن بانفعال: فين اللاااااااب؟
شهاب: لاب إيه؟
كارمن بصريخ: متستفزنييييش!
**الحلقة السادسة والعشرون ٢٦**
شهاب: آه اللااااب.. اللي فيه فيديوهاتك مع تجار المخدرات.
تتخض كارمن ومتبقاش عارفة تبلع ريقها.
كارمن: إنت فتحتهم؟
شهاب: اتفرجت ع واحد واحد.. جامدين أوي صراحة.
كارمن: رجع اللاب ده، ممكن يطير فيه ناس.
شهاب: هتطير فيه رقبة واحدة، وهي رقبتك.
كارمن: من الآخر عاوز إيه يا شهاب؟
شهاب: 50 مليون جنيه، واللاب يبقى عندك الصبح.
كارمن بخضة: إييييه؟ إنت اټجننت؟ 50 مليون!!!!!
شهاب: والله أنا مرضتش أقول 100 نظرًا لظروفك الصعبة.
كارمن: بس أنا معيش المبلغ ده.
شهاب: اتصرفي.. استلفي من إنجي حبيبتك.. قوللها إنك لو مدفعتيش شهاب هيودي اللاب ده للشرطة، وقبلها هيكون فاضحك في كل حتة بالفيديوهات دي، وأولهم جوزك.
كارمن: إنت بتعمل كدة ليه؟ حرام عليك، هتخرب بيتي.
شهاب: م أنا اتخرب بيتي وحياتي كلها باظت وقاعد في الشارع بسببك.. خسرتيني أهلي وخسرتيني حبيبتي.. كنتي فاكرة إني هعديهالك كدة بسهولة؟ انسي.. قدامك يومين يا كارمن، وبعدهم متزعليش من اللي هيحصل.
يقفل شهاب.
كارمن بتلف حوالين نفسها مش عارفة تعمل إيه.
تمسك الفون.
كارمن: ألو.. الحقيني يا إنجي.
يعدي الوقت.
إنجي وكارمن قاعدين في العربية في شارع شهاب.
كارمن: هنزله.
إنجي: استني، إنتي متأكدة إنه هنا؟
كارمن: أيوة، أنا كلمت أخته وقالتلي إنه في المكتب بتاعه، شقة في العمارة دي.
إنجي: وهتطلعي تعملي إيه؟
كارمن: هتكلم معاه يمكن يرضى يدهولي.
إنجي: إنتي متخلفة؟ هو ده هييجي بالكلام؟
كارمن بانفعال: أومال أعمل إييييه؟
إنجي: إحنا خلاص عرفنا مكانه، هنروح دلوقتي ونبعتله اللي يجيبهولك لحد عندك.
كارمن: فكرك هييجي بالعنف؟
إنجي: هي ديته علقة، هيقول حرمت و هيديكي اللاب.
كارمن وهي بتدور العربية: طيب ماشي.
يمشوا.
عند شهاب، قاعد بيقلب في الفون في صور فاطمة.
شهاب: وحشتيني والله.
يرن الفون.
شهاب: ألو.
الأم: إنت فين يا شهاب؟
شهاب: في داهية، عاوزين مني إيه؟
الأم بقهرة: ليه كدة بس؟ ليه اللي عملته ده؟ إحنا قصرنا معاك في إيه؟ قلت جواز وسيبناك تخطب، كنت عاوز إيه تاني؟ بس ليه تفضحنا كدة؟
شهاب: يما بالله عليكي أنا ناقص تقطيم؟ سبيني باللي أنا فيه.
الأم: يا بني حرام عليك، إمتى هتتعدل بس؟
شهاب: بكرة ربنا يريحني والدنيا هتبقى زي الفل.
الأم: بعد الشر عليك.. هبعتلك هدير بأكل وهدوم.
شهاب بتنهيدة: ماشي.
يقفل شهاب.
يعدي الوقت.
كارمن في فيلتها هي وإنجي، كارمن عمالة رايحة جاية.
إنجي: يا بنتي اقعدي، خايلتيني.
كارمن: خايفة أوي.
إنجي: من إيه بس؟
كارمن: من كل اللي بيحصل ده.
إنجي: اقعدي طيب، زمانهم جايين بيه دلوقتي.
تقعد كارمن متوترة.
في مكتب شهاب، يخبط الباب جامد.
شهاب: براحة يا حمارة.
يقوم شهاب يفتح، مفكرها هدير، يلاقيهم ٣ رجالة بادي جارد.
يتخض.
…….. إنت شهاب؟
شهاب: ع حسب.
…….. تنزل معانا بأدب يا……
شهاب: من غير ما تكمل، جاي.
يقفل شهاب المكتب وينزل معاهم.
يركبوا العربية ويمشوا.
تشوفهم هدير.
هدير: رايح فين ده؟ أنا هرجع بالأكل تاني.
ترجع هدير البيت.
يوصلوا البادي جارد فيلا كارمن.
ينزلوا وينزلوا شهاب ويدخلوا بيه الجراچ.
يدخل واحد منهم لكارمن.
…….. في الجراچ يا هانم.
تتخض كارمن.
تقوم هي وإنجي يروحوا الجراچ.
شهاب: ليه كل الأكشن ده؟ لو كنتي قلتيلي تعلالي كنت جيتلك.
كارمن بقلق: اربطوه، متسبهوش كدة.
يربطوه في الكرسي.
شهاب: إيه ده؟ فينا من كدة؟
كارمن: إنت اللي بدأت.
شهاب: تمام.
كارمن: فين اللاب يا شهاب؟
شهاب: مفيش لابات.
وفجأة يضربه البادي جارد بوكس، يوقعه بالكرسي، ويرجع تاني يعدله.
كارمن: قول هو فين أحسنلك، بدل والله هيخلصوا عليك.
شهاب بضحك: أكيد هضحك من اللي هيحصل فيكي بعد ما أخلص من هنا.
كارمن بانفعال: متستفزنييييش!
شهاب: هو أنا مقلتلكيش؟ أنا لو جرالي حاجة موصي اللي شايل معاه اللاب إنه يسلمه للشرطة.. أهو الواحد يلم له كام حسنة قبل ما يروح.
تشاور كارمن للبادي جارد ينزل فيه ضرب.
لما ينزف بؤه ومناخيره.
كارمن: كفاية.
يوقفوا ضرب.
كارمن: قولي هو فين أحسنلك.
شهاب بضحكة مستفزة: أنا جعان والله، متعشتش، قوليله ميضربش ع معدة فاضية هرجع.
كارمن تلف حوالين نفسها خلاص جابت آخرها.
كارمن بانفعال: يا بني إنت مبتحسش؟
شهاب: لأ.. اللي كنت بحس بيها ضيعتيها مني.. دلوقتي بقيت بارد، مبحسش حتى بالوجع.
كارمن: تحب أجيبهالك هنا؟
يتخض شهاب.
شهاب بغضب: ورحمة أمك لو عملتيها م هيكفيني فيكي إعدام.
كارمن: يبقا تقول اللاب فين أحسنلك، بدل م أجيبها هنا وأخلي رجالتـي يرجعولك إحساسك بيها.
يسكت شهاب.
عقدتله الدنيا.
شهاب: ماشي هجيبهولك.
كارمن: تقولي هو فين، لكن إنت مش هتتحرك من هنا.
شهاب: لازم أنا اللي أروح، لو مش مطمنة خلي حد من رجالتك ييجي معايا.
كارمن: لا مش هخلي حد ييجي معاك، بس لو غدرت.. هغدر أنا كمان ببطة.
يبصلها بغيظ.
كارمن: فكوه وسيبوه يمشي.
يفكوه.
كارمن: قدامك ساعتين وتكون عندي باللاب، ماشي؟




