
فاطمة: صدقني لما تقرب مني هتكرهني.
هيثم: أنا مستحيل أكرهك.
فاطمة: لا هتكرهني.. لما أتعامل معاك ببرود وانعدام مشاعر هتكرهني، ومش عشان إنت هيثم، ده عشان مبقاش في حاجة جوايا أديها لحد.
هيثم: وليه تعملي في نفسك كدة؟ مهو سافر واتغنى وأكيد البنات حواليه بالهبل وصوره مالية النت وسابك وعايش.. ليه متعيشيش إنتي كمان بقا!!!!!
فاطمة: لا، متقارنش قلب بقلب.. متقارنش اللي اتكسر بالندمان.
هيثم: واخرتها؟
فاطمة: متخافش، لا هكون ليك ولا لغيرك.
هيثم: إنتي كدة بتدخلينا في حيطة سد.
فاطمة: لا نهائي، أنا بوضحلك كل حاجة عشان متتعشمش وعشان فعلًا منوصلش لحيطة سد.
هيثم: يعني ده آخر كلام عندك؟
فاطمة: آه يا هيثم.
هيثم: ماشي يا فاطمة.. اللي تشوفيه.
يمشي هيثم.
تتنهد فاطمة.
يوصل شهاب ومريام قدام مطعم.
يركنوا وينزلوا.
شهاب: رايحة فين؟
مريام: داخلة المطعم.
شهاب: مطعم إيه؟ هو فين؟
مريام: بنمشي الممر ده للآخر وبعدين تلاقيه.
شهاب وهو ماشي جنبها: أول مرة أعرف إن في مطعم هنا.
مريام: هو مستخبي شوية بس هيعجبك أوي.
شهاب: أمممم.
يدخلوا المطعم، عبارة عن مخدات كبيرة في الأرض والناس قاعدين في الأرض والسيرفيس لابسين لبس البدو.
مريام: إيه رأيك في الاستايل ده؟
شهاب: حلو جدًا.
مريام: هتعرف تقعد ع الأرض ولا نقعد فوق؟
شهاب: لا بحب قعدة الأرض.
يقعدوا ع المخدات في الأرض.
يجلهم براد شاي وكوبيات صغيرة.
تقرب مريام تصب لشهاب وتديهوله، وبعدين تصب لنفسها.
شهاب: تقيل أوي.
مريام: عشان شاي عرباوي، ده المشروب الضيافي بتاع المكان.
شهاب: أمممم حلو.
مريام: أومال لو دوقت الأكل بقا هنا يجنن.
شهاب: اشطااا، نتعشى هنا.
مريام: ده إنت داخل ع طمع بقا.
شهاب: أنا ما زلت معزوم، مش دافع مكافأة.
مريام: خليك عارف مش هدفع أكتر من حق الشاي.
شهاب: اللي هو بيتوزع ببلاش أصلًا.
مريام: هههههه بالظبط كدة يا شبح.
شهاب: خلاص هعزمك أنا ع العشا، شكلك غلبان.
مريام: باين عليا أوي كدة؟
شهاب: باين ع بنطلونك.
مريام لابسة بنطلون كاتينج.
مريام: هههههه.
يسكت شهاب دقيقة.
شهاب: مريام.
مريام: إيه؟
شهاب: عاوز أنزل مصر.
مريام: وحشتك؟
شهاب: أوي.
مريام بزعل: بس إنت لو نزلت مصر أنا هكون هنا لوحدي، وأنا مصدقت بقالي حد هنا أقرفه.
شهاب: تعالي معايا، واهو اعتبريها فسحة.
مريام: أكيد أهلي مش هيرضوا طبعًا.
شهاب: قوللهم سفر تبع الشغل كام يوم وراجعة.
مريام: وإنت هترجع كمان كام يوم؟
شهاب: أنا بس نفسي أشوفها هي وأهلي.




